Системска и семејна психотерапија

Се базира на системско третирање на индивидуалниот проблем. На симптомите со кои клиентот се соочува, гледа како на проблем со кој се соочува цело семејство, а не само поединецот кој е носител на симптомот. Покрај истражувањето на важноста на структурната поставеност на семејните членови, нивната улога, хиерархиска поставеност, за да се разберат интерперсоналните релации, работи и на трансакционите процеси помеѓу семејните членови, субсистеми, постоечките обрасци и начините на организација на односите.

Системскиот приод во терапискиот процес , помага да се увиди меѓусебната зависност во однесувањето на членовите во семејството. Интеракциските обрасци помеѓу членовите се поврзани со однос акција – реакција помеѓу сите семејни членови. Имено, однесувањето на еден член во семејството е поврзано со реакцијата на друг член, во однос на првиот член, што за поврат ќе има реакција од првиот член и.т.н . и тоа е поврзано со однос реакција - акција и од другите членови во семејството.

Системскиот семеен пристап работи на деконструкција, промена на верувања и идеи кои придонесуваат за дисфункционални семејни релациски односи. Промена на обрасците на однесување, носи кон функционално семејство, нова динамика и исчезнување на симптомот. Семејниот систем е во постојано движење и промена. Минувајќи низ животните фази, се менува структурата и динамиката во семејството. Со тоа се менува улогата, идентитетот и искуството на секој член од семејството. Новите услови се стресни и може да предизвикаат криза и дестабилност на семејството. Kонцептот на семејниот развој во текот на минувањето на животните фази, e доживотен процес на социјализација, прилагодување и учење во рамките на семејството.

Преку насочување на семејната резилиентност, емоционалната поврзаност, комуникации кои поттикнуваат споделување на емоции и мисли во сигурна средина, поставување граници, почитување автономија, распределба на моќ и одговорност, и др., се работи на функционално прилагодување на семејството во животните фази, ускладеност на поединецот, семејството и средината во која живее. Наместо гледање на проблемот од една страна , се понудува нова перспектива, нов агол на перцепирање и доживување на проблемот. Тоа носи кон помрднување на семејниот систем за неколку степени и наоѓање решенија оптимални за семејството во дадениот момент (Де Шазер,С & Берг,И.К. )

Во зависност од потребата , сеансите се закажуваат еднаш неделно или на две недели . Една сесија трае 1 ч.